ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

«Адыгэ псалъэм» и щIэджыкIакIуэхэм захудогъазэ

2018-01-20

  • Иужьрей махуэхэм редакцэм цIыху куэд къызэрыпсалъэм кърикIуащ мы тхыгъэр. ПщIэ зыхуэтщI ди щIэджыкIакIуэхэ, фэ фыщIоупщIэ газетыр махуэ къэс ныщIыфхуамыхьым и щхьэусыгъуэм. Абы и жэуапыр мыращ – мы илъэсым ди газетыр тхьэмахуэм щэ къыдэкIыну аращ икIи къэхъуам ди зэран хэлъкъым.
  •  
  • «АДЫГЭ псалъэм» и закъуэкъым апхуэдэ мардэм трагъэувар, «Кабардино-Балкарская правда», «Заман» газетхэри апхуэдизрэщ тхьэмахуэм дунейм къызэрытехьэнур. Апхуэдэ унафэ къащтащ газетхэр къыдэзыгъэкIхэу КъБР-м и Парламентымрэ Правительствэмрэ, республикэм и мызакъуэу, зэрыкъэралу экономикэ и лъэныкъэкIэ щытыкIэ гугъум зэритыр, мылъкур къыдэгъэхуэн зэрыхуейр я тегъэщIапIэу.
  • Дызэрыщыгъуазэщи, газет къыдэгъэкIыным текIуадэр мащIэкъым. Апхуэдэу щытми, ар удынышхуэ хуэхъуну къыдолъытэ ди анэдэлъхубзэр лэжьэным. Дигу зэрыдгъэфIырщи, ар пIалъэкIэ зыхуэкIуа Iэмалу къыджаIащ, экономикэ щытыкIэр зэпIэзэрыт хъужмэ е нэгъуэщI хэкIыпIэхэр къагъуэтмэ, ди газетхэри тхьэмахуэм тхуэ къыдэкIыу зэтраублэжыну я мурадщ.
  • Шэч хэмылъу, дэри къыдэхьэлъэкIащ газетым и къыдэкIыгъуэхэр зэрагъэмэщIар, сыту жыпIэмэ, дэ нэсу зыхыдощIэ бзэм зиужьынымкIэ, ар лъэпкъым фIэмыкIуэдынымкIэ ди пщэ къыдэхуэ жэуаплыныгъэр. Зым и дежкIи щэхукъым – бзэр щымыIэжмэ, лъэпкъи щыIэжынукъым. Ди фIэщ мэхъу фэри нэхъыбэу фызыгъэпIейтейр ди бзэм апхуэдэ шынагъуэ къыщхьэщымыгъэхьэнырауэ зэрыщытыр.
  • КъимыдэкIэ, илъэс ныкъуэм хуэзэу пощтым Iэ тедзапщIэу фIихащ тхьэмахуэм тхуэ къызэрыдэкIыу щытам тещIыхьа уасэр. Иджы абы лейуэ ахъшэ ефтауэ къыщIэкIащ. Ар къыватыжын-къывамытыжыным теухуауэ фыщыщIэупщIэ хъуну къыщIэкIынщ Iэ щытевдза пощт IуэхущIапIэхэм.
  • «Адыгэ псалъэ» газетым  и  редакцэм  и  лэжьакIуэхэр.