ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Гулъытэм хохъуэ

2018-01-20

  • КъБР-м узыншагъэр хъумэнымкIэ и министр Хъубий Марат щIэуэ яухуа Перинатальнэ центрым и лэжьыгъэр зэрекIуэкIым зыщигъэгъуэзащ. Ар къызэрызэIуахрэ абы дунейм къыщытехьащ сабий 562-рэ. А бжыгъэм къегъэлъагъуэ зэрылажьэрэ мазитI фIэкIа мыхъуа IуэхущIапIэм республикэм и цIыхубзхэм фIагъ лъагэ зиIэ медицинэ Iуэхутхьэбзэхэр зэрыщагъуэтыр.
  •  
  • Перинатальнэ центрым и дохутыр нэхъыщхьэ Гаевэ Алёнэ зэрыжиIэмкIэ,  дунейм къытехьа сабийхэм ящыщу 13-р зэтIолъхуэныкъуэщ, 62-р я пIалъэр къэмысу къалъхуащ, 38-р реанимацэ къудамэм щIэхуащ. Сабийхэм псоми сыт и лъэныкъуэкIи зыхуей дэIэпыкъуныгъэхэр ягъуэтащ. Мы зэманым ахэр центрым щIатхыкIыжащ, я узыншагъэкIэ шынагъуэ щыIэкъым. Нэхъ гугъу дехьащ зи хьэлъагъыр мащIэ дыдэ хъууэ дунейм къытехьа цIыкIухэм. Грамм 480-рэ, 600, 980-рэ хъууэ къалъхуа цIыкIуищым хуэмурэ я хьэлъагъым хагъахъуэ, иджыпстукIэ я щытыкIэм арэзы къещI.
  • ФIагъ лъагэ зиIэ медицинэ Iуэхутхьэбзэхэр хуащIэ цIыхубзхэми. Апхуэдэу уэндэгъугъэр къызэпамыуду операцэ хьэлъэу 17 ирагъэкIуэкIащ. Центрым и IэщIагъэлIхэм зэрыжаIэмкIэ, я лэжьыгъэр зэрефIакIуэр куэдкIэ и фIыгъэщ IуэхущIапIэр иджырей медицинэ IэмэпсымэхэмкIэ къызэрызэгъэпэщам, гупыр зэкъуэту щытыкIэ гугъухэм къызэрикIыну хэкIыпIэр къызэралъыхъуэм.
  • Перинатальнэ центрым и лэжьыгъэр зригъэлъэгъуа, гулъытэ нэхъы-бэ зыхуэщIыпхъэ Iуэхухэм тепсэлъыхьа нэужь, а IэнатIэмкIэ жэуаплыныгъэ нэхъыбэ зыхьхэм пщэрылъ ящищIащ уэндэгъугъэр къызэпыудынкIэ шынагъуэ зиIэ бзылъхугъэхэм я щытыкIэр нэхъ ткIийуэ къапщытэну. «Апхуэдэ гупым хыхьэ бзылъхугъэ-хэм ятеухуа хъыбарыр район сымаджэщхэм и чэзум Перинатальнэ центрым зэрыIэрагъэхьэн хуейм гулъытэ нэхъыбэ хуэфщIыну сыныволъэIу. Анэми сабийми я узыншагъэр Iэмал имыIэу тхъумапхъэщ», – жиIащ Хъубий Марат.
  •  
  • КъБР-м Узыншагъэр хъумэнымкIэ
  • и министерствэм
  • и пресс-IуэхущIапIэ.