ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Абхъаз театрым бжьыпэр еубыд

2017-12-09

  • ЩоджэнцIыкIу Алий и цIэр зезыхьэ Къэбэрдей къэрал драмэ театрым иджыблагъэ щекIуэкIащ «Южная сцена» дунейпсо театр фестивалыр.
  •  
  • - Фестивалыр 2010 гъэм Фырэ Руслан и жэрдэмкIэ ирагъэжьауэ щытащ. Зэрынэрылъагъущи, лъапэ махуэ ичат а Iуэхум икIи мы гъэм ещанэу ар ди республикэм щызэхашэ. Абы ипэкIэ фестивалыр Кавказ Ищхъэрэм и щIыналъэхэм я деж щрагъэкIуэкIыу щытамэ, мы гъэм щегъэжьауэ дунейпсо мыхьэнэ иIэ хъуащ, – щыжиIащ КъБР-м щэнхабзэмкIэ и министрым и къуэдзэ Карчаевэ Iэминэ а Iуэхум хуэгъэпса пресс-конференцым.
  • - Лъэпкъ щхьэхуэм и дунейм ухыхьэныр, абы щыгъуазэ зыпщIыфыныр насыпышхуэщ – а лъэпкъым и псэ къулеигъэр зымащIэкIэ нэхъ мыхъуми зыхыбощIэ. Хуабжьу гъэщIэгъуэнщ театр дунейм зэрызиужьым укIэлъыплъыну, ауэ щыхъукIи, абы лъэпкъ щхьэхуэныгъэхэр екIуу щахъумэж. Лъэпкъ театрым гъэпсыкIэ щхьэхуэ иIэщ, абы тхакIуэщIэхэр къыщагъэунэху къохъу, ар икъукIэ Iуэху щхьэпэщ, – къыхигъэщащ театрым и критик, «Страстной бульвар» журналым и редактор нэхъыщхьэ Глебовэ Еленэ.
  • «Ночь вдали от Родины» фIэщыгъэм щIэт таджик спектаклымкIэ къызэIуахащ фестивалыр. И гупсысэ нэхъыщхьэр цIыхур къуэпс быдэкIэ и хэкум зэрыпыщIарщ, абы хуиIэ фIылъагъуныгъэ инырщ.
  • Фестивалым хэтащ Абхъазым, Шэшэным, Дагъыстэным, Къэрэшей-Шэрджэсым, Таджикистаным, Осетие Ипщэм къикIа театр гупхэр. А псоми ящыщу нэхъыфIу къалъытар Чанбэ Самсон и цIэр зезыхьэ Абхъаз къэрал драмэ театрым игъэлъэгъуа «Пешком» спектаклырщ.
  • Режиссёр нэхъыфI хъуащ ЩоджэнцIыкIу Алий и цIэр зезыхьэ Къэбэрдей къэрал драмэ театрым и художественнэ унафэщI Фырэ Руслан (ягъэлъэгъуар Ольмезов Мурадин и «Унэ лъапIэм» къытращIыкIа спектаклырщ). А лэжьыгъэращ «Сценографие нэхъыфI» Iыхьэм пэрыт щыхъуари.
  • ЦIыхухъум и роль нэхъыфI ягъэзэщIауэ къалъытащ артистхэу Жангуразов Мэжид (Балъкъэр театр), Шыбзыхъуэ Басир (Къэбэрдей театр), Абдумумин Шарафи (Таджик театр). «ЦIыхубз роль нэхъыфI» Iыхьэм я цIэ къыщраIуащ: Ёровэ Мохпойкар (Таджик театр), Гаджитэ Игэ, Маргиевэ Ингэ (Осетие Ипщэ театр), Багаповэ Зулейхан (Шэшэн театр) сымэ.
  • Фырэ Руслан къызэрыхигъэщамкIэ, илъэс зыбжанэ хъуауэ екIуэкI фестивалыр кIуэ пэтми нэхъ ину, зыхуей хуэзэу къызэрагъэпэщ.
  • - «Южная сцена» фестивалым къыхыхьэну хуейуэ куэдым хъыбар къыдагъэщIат. Псалъэм папщIэ, Дагъыстэным щыщу театриблым къытхуатхати, Даргин театрым и закъуэщ къыхэтхар. Хуабжьу спектакль гъэщIэгъуэн куэд утыку кърахьат мы гъэм. Апхуэдэт Таджикым, Абхъазым, Шэшэным къикIа гупхэм ягъэлъэгъуахэр. Театрым и лэжьакIуэхэм ди зэфIэкIыр здынэсымрэ, адрей театрхэм щекIуэкI гъащIэмрэ тлъагъунымкIэ, зыдужьынымкIэ фестивалым и къалэныр инщ, – жиIащ Фырэ Руслан фестивалыр щызэхуащIыж пшыхьым.
  •  
  • Инэрокъуэ Данэ.
  • Сурэтхэр Къарей  Элинэ трихащ.