ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

Джылахъстэнейм и псэукIэм ухегъэгъуазэ

2017-12-06

  • Котляровхэ Викторрэ Мариерэ я тхылъ тедзапIэм иджыблагъэ къыщыдэкIащ «Малая Кабарда в годы становления и развития социализма» фIэщыгъэм щIэт тхылъыр. Беслъэней Владимир и Iэдакъэ къыщIэкIа а тхылъыр хуэгъэпсащ зи гугъу ящI лъэхъэнэм Тэрч щIыналъэм къыщыхъуа зэхъуэкIыныгъэхэм.
  •  
  • Тхылъ тедзапIэм и унафэщI Котляров Виктор а тхылъым теухуауэ мыращ жиIэр:
  • - Совет властым и лъэхъэнэм ящIа псори ди зэманым къемызэгъыжу къалъытэ. А лъэхъэнэ хьэлъэр иджыри къыздэсым нэсу тхыдэм къыщыгъэлъэгъуэжа хъуакъым, абы щыгъуэ къэхъуа зэхъуэкIыныгъэхэм фIыуи Iейуи хэлъахэм тепсэлъыхьын къахэкIакъым. Беслъэней Владимир и тхылъым а псоми зэхэхауэ я гугъу щещI. Дэфтэр тхыгъэхэр и тегъэщIапIэу абы хузэфIэкIащ совет лъэхъэнэм Джылахъстэнейм и псэукIар зэфIигъэувэжын.
  • Тэрч районыр ящыщщ Къэбэрдей-Балъкъэр АССР-м и япэ административнэ щIыналъэхэм. 1985 гъэм и щIышылэ мазэм абы промышленнэ предприятэу 7 щылажьэрт: налмэс заводым союзпсо, предприятитхум республикэпсо, зым щIыналъэ мыхьэнэ яIэт.  ЩIыналъэм ит колхоз 11-мрэ совхозиблымрэ щIыуэ гектар 73420-рэ яIыгът.
  • Районым ис цIыхухэм медицинэ IуэхущIапIэ 36-м Iуэхутхьэбзэхэр къыщыхуащIэрт. 1983 гъэм щIышылэм и 1-м ирихьэлIэу щIыналъэм ит курыт еджапIэхэм ныбжьыщIэ 10578-рэ щIэныгъэ щрагъэгъуэтырт. ЩэнхабзэузэщIыныгъэ лэжьыгъэм ехъулIэрт щэнхабзэмкIэ унэ 15-р, къуажэ библиотекэхэр. Къуажищым тхыдэ-лъахэхутэ музейхэр дэтт.
  • Тэрч районым и цIыхухэр зэрыпсэуамрэ абыхэм Къэбэрдей-Балъкъэрым и экономикэм хуащIа хэлъхьэныгъэфIымрэ лъэныкъуэ куэдкIэ уи фIэщ ещIыф тхылъыр зи IэдакъэщIэкI Беслъэней Владимир. Къэплъытэ хъунущ а къыдэкIыгъуэр а щIыналъэм щыпсэуа лэжьакIуэбэм я гъащIэм и щIэнгъуазэу.
  •  
  • Тэрчокъуэ Дисэ.