ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

ЩIэблэм я къэкIуэнум толажьэ

2017-04-19

  • КъБКъУ-м Щэнхаб-зэмкIэ и центрым, Темыркъан Хьэту и цIэр зезыхьэм, иджыблагъэ щекIуэкIащ зэIущIэ щхьэпэ.
  •  
  • Абы щызэхуашэсат университетым къепхауэ лажьэ Школ академие цIыкIум щеджэхэм я адэ-анэхэр. КъБКъУ-м и пресс-IэнатIэм и лэжьакIуэ Дол Иннэ хъыбар къызэрыдигъэщIамкIэ, зэIущIэм и лэжьыгъэм хэтащ а академием и унафэщI Насып Артур, КъБКъУ-м и къудамэхэм я пашэхэр, университетым абитуриентхэр щIэтIысхьэныр къызэгъэпэщынымкIэ и IэнатIэм и унафэщI Гъуэгузокъуэ Тимур, еджапIэ нэхъыщхьэм хыхьэ институтхэм, факультетхэм я кафедрэхэм я унафэщIхэр, егъэджакIуэхэр.
  • Школ академие цIыкIум щеджэхэм я Iуэху зыIутым, яIэ ехъулIэныгъэхэм щытепсэлъыхьащ зэхуэсым. Ар къызэIуихащ икIи иригъэкIуэкIащ Насып Артур.
  • - Ди академием мы зэманым щоджэ ныбжьыщIэ 225-рэ. Абыхэм ящыщ дэтхэнэми IэмалыфI иIэщ еджапIэ нэхъыщхьэм лъэпощхьэпоуншэу щIэтIыс-хьэну, – жиIащ Насыпым. – Зэхуэсым цIыху куэд къызэрырихьэлIам къегъэлъагъуэ адэ-анэхэми, егъэджакIуэхэми, универ-ситетым и IэнатIэ зэмылIэужьыгъуэхэм я унафэщIхэми – псоми щIэблэм я къэкIуэнум гулъытэ зэрыхуэтщIыр, абы дызэрыхуэлажьэр. Си гуапэщ фи бынхэм я мурадхэр, хъуэпсапIэхэр къайхъулIэну.
  • Я бынхэм я Iуэху зыIутым щыгъуазэ хуащIу, адэ-анэхэм епсэлъащ абыхэм я егъэджакIуэхэр. КъБКъУ-м Архитектурэм-кIэ, ухуэныгъэмрэ дизайнымкIэ и институтым и кафедрэм и егъэджакIуэ нэхъыжь Бэрэгъун Люся зэрыжиIамкIэ, академием етIанэгъэ къыщызэIуахынущ «Архитектура» унэтIыныгъэщIэр. Абы щIэтIыс-хьэну гукъыдэж зыщIхэм черчениемкIэ творческэ экзамен ятын хуейщ. Школ академие цIыкIум щеджэхэм иджыпсту ябгъэдэлъ щIэныгъэр къэплъытэмэ, абыхэм ящыщ дэтхэнэми IэмалыфI иIэщ а къэпщытэныгъэм ехъулIэныгъэкIэ пхыкIыну.
  • Университетым зэрыщIэтIысхьэ хабзэхэм ятеухуауэ адэ-анэхэм яIэ упщIэхэм жэуап зэпкърыха иритащ Гъуэгузокъуэ Тимур.
  • Академием и унафэщIхэм, егъэджакIуэхэм фIыщIэ хуащIу зэхуэсым къыщыпсэлъащ адэ-анэ зыбжанэ. Абыхэм жаIащ республикэм и еджапIэ нэхъыщхьэм и гупэр школым зэрыхуигъэзар хуабжьу я гуапэ зэрыхъуар, ар къэзыух я сабийхэм я щIэныгъэм щыхагъэхъуэну я мурадыр КъБКъУ-р арауэ зэрыщытри къыхагъэщащ. Псом хуэмыдэу адэ-анэхэм фIыщIэшхуэ хуащIырт еджакIуэ гупхэм я кураторхэм.
  • Адэ-анэхэмрэ университетым и лэжьакIуэхэмрэ я зэхуэсыр купщIафIэу екIуэкIащ. Апхуэдэ зэIущIэхэр дяпэкIи къызэгъэпэщын зэрыхуейри щыжаIащ зэIущIэм.
  •  
  • Тамбий Линэ.