ФИФI ФЫМЫГЪЭПУД, ФИ IЕЙ ФЫМЫГЪЭПЩКIУ

АДЫГЭ ПСАЛЪЭ

И зэфIэкIхэм папщIэ

2016-01-23

  • Урысейм Естественнэ щIэныгъэхэмкIэ и академием и президиумым и унафэкIэ, Къэбэрдей-Балъкъэр къэрал мэкъумэш университетым IэщIагъэм профессиональнэу хэгъэзэгъэнымкIэ и центрым и унафэщI, профессор Къагъырмэс Црай «ЩIэныгъэм зегъэужьыным хуищIа хэлъхьэныгъэм папщIэ» медалыр иджыблагъэ къыхуагъэфэщащ.
  •  
  • Профессор Къагъырмэс Црай щIэныгъэ лэжьыгъэу 335-рэ иIэщ. Абыхэм ящыщу 15-р монографиещ.  Мэзкуу къэрал университетым 2010 гъэм щекIуэкIа Урысейпсо щIэныгъэ-практикэ конференцым абы щищIа «Къэралым и ерыскъыпхъэ шынагъуэншагъэр къызэгъэпэщын» жыхуиIэ докладым папщIэ, Вавилов Н. и цIэкIэ ягъэува «ЩIэныгъэм и лIыхъусэжь» дыжьын медалыр къратауэ щытащ.
  • Мэзкуу мэкъумэш академием, Тимирязевым и цIэр зезыхьэм, 2012 гъэм щызэхэта Дунейпсо щIэныгъэ конференцым щищIа докладым Тимирязев К. А. и щIыхькIэ ягъэува дыщэ медалыр, Къэбэрдей-Балъкъэр Республикэр и щапхъэу, Мэзкуу ЩIэныгъэмкIэ и дунейпсо еджапIэм щищIа докладым – «2012 – 2015 гъэхэм, апхуэдэу 2020 гъэ пщIондэ къэралым и социально-экономикэ зыужьыныгъэм и стратегиер» жыхуиIэм – «И зэфIэкIым папщIэ» щIыхь жорыр къыхуагъэфэщащ.
  • Экологие шынагъуэншагъэмрэ щIыуэпсыр къэгъэсэбэпынымкIэ дунейпсо жылагъуэ академием и академикыу Къэбэрдей-Балъкъэрым иIэр Къагъырмэс Црай и закъуэщ.
  • ДЫЩЭКI Альберт.